ਅਟਾਰੀ-ਵਾਹਗਾ ਬਾਰਡਰ ‘ਤੇ ਪਾਕਿ ਰੇਂਜਰਾਂ ਨੇ ਭਾਰਤੀ ਰੇਂਜਰਾਂ ਨੂੰ ਮਿਠਾਈ ਭੇਟ ਕੀਤੀ

ਅੰਮ੍ਰਿਤਸਰ – ਅੱਜ 14 ਅਗਸਤ ਨੂੰ ਪਾਕਿਸਤਾਨ ਵਿੱਚ ਅਜ਼ਾਦੀ ਦੇ ਜਸ਼ਨ ਮਨਾਏ ਜਾ ਰਹੇ ਹਨ, ਇਸ ਮੌਕੇ ਪਾਕਿਸਤਾਨ ਰੇਜਰਾਂ ਵਲੋਂ ਅੱਜ ਸਵੇਰੇ ਜੁਆਇੰਟ ਚੈੱਕ ਪੋਸਟ ਅਟਾਰੀ ’ਤੇ ਬੀ.ਐੱਸ.ਐੱਫ. ਨੂੰ ਮਿਠਾਈ ਭੇਂਟ ਕੀਤੀ ਗਈ। ਪਾਕਿਸਤਾਨ 14 ਅਗਸਤ ਨੂੰ ਆਪਣਾ ਸੁਤੰਤਰਤਾ ਦਿਵਸ  ਮਨਾਉਂਦਾ ਹੈ ਪਰ ਪੁਲਵਾਮਾ ਹਮਲੇ ਦੇ ਬਾਅਦ ਦੋਵਾਂ ਵਿਚਕਾਰ ਆਈ ਤਲਖ਼ੀ ਕਾਰਨ ਮਿਠਾਈਆਂ ਦਾ ਅਦਾਨ-ਪ੍ਰਦਾਨ ਬੰਦ ਹੋ ਗਿਆ ਸੀ। ਬੀ.ਐੱਸ.ਐੱਫ.ਵਲੋਂ 15 ਅਗਸਤ ਨੂੰ ਪਾਕਿਸਤਾਨ ਰੇਂਜਰਸ ਨੂੰ ਮਿਠਾਈ ਭੇਟ ਕੀਤੀ ਜਾਵੇਗੀ। ਇਸ ਤੋਂ ਇਲਾਵਾ ਅਟਾਰੀ ਦੀ ਜੁਆਇੰਟ ਚੈੱਕ ਪੋਸਟ (ਜੇ.ਸੀ.ਪੀ.) ਤੇ ਰਿਟ੍ਰੀਟ ਸੈਰੇਮਨੀ ਦੀ ਵੀ ਪਰੰਪਰਾ ਹੈ। ਇਸ ਦੌਰਾਨ ‘ਹਰ ਪਾਸੇ ‘ਵੰਦੇਮਾਤਰਮ’ ਤੇ ਢੋਲ ਦੀ ਥਾਪ ‘ਤੇ ‘ਭਾਰਤ ਮਾਤਾ ਕੀ ਜੈਅ’ ਦੇ ਨਾਅਰੇ ਖ਼ੂਬ ਗੁੰਜਦੇ ਹਨ। ਇਸ ਦੌਰਾਨ ਸਰਹੱਦ ਸੁਰੱਖਿਆ ਬਲ ਦੇ ਜਵਾਨਾਂ ਦਾ ਜੋਸ਼ ਦਿਖਾਈ ਦਿੰਦਾ ਹੈ। ਬੀਟਿੰਗ ਰਿਟ੍ਰੀਟ ਸੇਰੇਮਨੀ ਦੀ ਸ਼ੁਰੂਆਤ ਸਾਲ 1959 ‘ਚ ਹੋਈ ਸੀ। ਇਹ ਹਰ ਰੋਜ਼ ਸ਼ਾਮ ਨੂੰ ਦੋਵੇਂ ਦੇਸ਼ਾਂ ਦੇ ਰਾਸ਼ਟਰੀ ਝੰਡਾ ਸਮਾਗਮ ਨਾਲ ਉਤਾਰੇ ਜਾਂਦੇ ਸਨ। ਇਸ ‘ਚ ਭਾਰਤ ਵੱਲ਼ੋਂ ਬੀ.ਐੱਸ.ਐੱਫ. ਦੇ ਜਵਾਨ ਤੇ ਪਾਕਿਸਤਾਨ ਵੱਲੋਂ ਪਾਕਿ ਰੇਂਜਰਸ ਸ਼ਾਮਲ ਹੁੰਦੇ ਹਨ। ਦੋਵਾਂ ਦੇਸ਼ਾਂ ਦੇ ਹਜ਼ਾਰਾਂ ਲੋਕ ਪਹੁੰਚਦੇ ਹਨ ਤੇ ਆਪਣੇ ਜਵਾਨਾਂ ਦਾ ਜੋਸ਼ ਵਧਾਉਣ ਲਈ ਦੇਸ਼ ਭਗਤੀ ਦੇ ਨਾਅਰੇ ਲਾਉਂਦੇ ਹਨ। ਰਿਟ੍ਰੀਟ ਸੈਰੇਮਨੀ 156 ਸੈਕਿੰਡ ਦੀ ਹੁੰਦੀ ਹੈ। ਇਸ ਤੋਂ ਬਾਅਦ ਦੋਵਾਂ ਦੇਸ਼ਾਂ ਦੀ ਸਰਹੱਦ ‘ਤੇ ਬਣੇ ਗੇਟ ਮੁੜ ਬੰਦ ਕਰ ਦਿੱਤੇ ਜਾਂਦੇ ਹਨ। ਪੁਲਵਾਮਾ ਹਮਲੇ ਤੋਂ ਬਾਅਦ ਇਕ ਵਾਰ ਫੇਰ ਸਰਹਦ ਤੇ ਦੋਵਾਂ ਪਾਸਿਆਂ ਦੇ ਰੇਂਜਰਾਂ ਦੇ ਚਿਹਰਿਆਂ ਤੇ ਖੁਸ਼ੀ ਦਿਸਣ ਲਗੀ ਹੈ, ਜੋ ਸ਼ਾਂਤੀ ਦਾ ਸੁਨੇਹਾ ਹੈ।